فاتت جنبنا

فاتت جنبنا .... وضحكت لنا ..***  لأ لأ يا عبد الحليم .. فاتت جنبنا وضحكت علينا ...

قالوا الربيع مشى من غربنا لشمالنا .. وشرقنا .. واحنا تمام .. والمختار بيقول فاتت جنبنا ...

نار مولعه غرب القرية ... والمختار بقول فاتت جنبنا...

فورت و ولعت شرق القرية .. والمختار بيقول فاتت جنبنا ...

وشمال القرية واللي غربهم .. طقطقت عندهم .. والمختار بيقول فاتت جنبنا ...

يعني احنا تمام ... لانها فاتت جنبنا .. معقول احنا تمام ...

طيب حي القرية الجنوبي ماله مولع ...

شو القصة .. بس هالمرة ما بقدر اقول .. فاتت جنبنا ...

طيب قلة الشغل وقلة الاكل وقلة المصاري وغيره.. خلا سكان الحي الجنوبي يولعوا ...

المشكله انو الرفاهيه و النعيم برضه بتمر من جنبهم من ثغر البلد الباسم للمقر ...  و من عاصمة جدودنا الانباط للمطار... يعني اهل الحي الجنوبي هالمره بيغنوا فاتت جنبنا...

شو سوا المختار وشلته ... معقول  رح يغني فاتت جنبنا ...

والشاويش رح يظل يوزع عصير ومي ... ويبرم شواربه وكمان يقول فاتت جنبنا ...

مد ايدك في جيبتك .. اضغط على حالك شوي...

طلع المصاري من جيوب الحراميه ... اداين من هون ومن هناك ...

منشان تفرجها على سكان الحي الجنوبي .... منشان تخليهم حاسين انهم منك وانت منهم..

ايواااا  انت منهم و همه منك حتى يرضو عنك ...

بدك يرضو عنك ...و انت منهم وهمه منك..

بيش يحلفولك يا مختار...انه الحياة صعبة والليالي مظلمة ...

ما قلقوا بحياتهم ..وما بكوا على مستقبلهم ..الا لما العدالة حيدت عنهم  و فاتت جنبهم ...

وقتها اكيد رح يقولوا انتهينا ..وبالحزن اتغطينا ...

فلا تخيب الهم ظنهم ..

اخذو شغلك ... قالو بسيطة   اخذو رزقتك ... قالو بسيطة

زهقوك عيشتك ... قالو بسيطة... شفطوا خبزاتك ... قالو بسيطة

سرقوا طبخاتك ... قالو بسيطة ... إغتالو حلمك ... قالو بسيطة

وهاي البسيطة ... بسيطة من لا حول له ولا قوة..

بس يا حبيبنا يا ابو عناد خلي مختارك يعرف انه ما طار طير وارتفع الا على سقف الخشابية وقع ...

وسقفها مش بعيد عنك ..ولا عن ... بسيطة.

حتى لو كنت على الطريق الصحيح ستدهسك الأقدام إذا جلست ...(ويل روجرز) ..

عشان هيك .. جملتك يا عبد الحليم  ** فاتت جنبنا ** بتزبط في اغانيك بس...