#يوميات_مسخسخ (15) ... " انتا جيت يا رمضان "
اهلا رمضان .. اهلا شهر الخير و البركة .. اهلا قطايف بالجوز .. اهلا "بنقوزات" الفتيش .. اهلا بالسحور .. اهلا صلاة التراويح .. كل عام و انتم بخير بمناسبة الشهر الفضيل .. شهر رفعات الأسعار .. شهر "الخوازيق" .. شهر استغلال المواطن من تُجّار الأطعمة و الألبسة و غيرو و غيراتو .. شهر الأكل الزايد .. شهر العزايم و "لمات" العيلة وصلة الرحم .. ^ وجبة السحور ... قصة عشق بدويّة .. بين أفراد العائلة ورمضان ، ولا أحلى من اجوائها .. الأم و البنات بجهزو المقبلات الطيبة مع البطيخ ..و " يلا يا بنات تأخرنا عليهم هسا بأذن" ... وريحة خبز الطابون تعطر أجواء البيت .. والأب يقرأ القرآن الكريم بصوت جهور ليهدي العائلة السكينة و السلام .. و الأخ الأكبر " يلا قوم اتسحر انتا وياه .. عشان ما "تقرقع" راسنا بكرا عطشان و جوعان " .. وتنهيد الأطفال " يلا ماما جوعان " ... أذّن الأذان الأول .. يعني كإنو دقت صفارة السباق " مين بشرب مي أكثر " .. و هجوم على "الحنفيات" و كولر المي .. و الثلاجة .. و القناني .. هههه و بأذّن الأذان الثاني و تقف العائلة صفْ خلف الوالد .. و تنوي الصيام .. ^وبعد نومة هنية .. اللي عنده شغل او دوام دراسي بقضيه .. و على الترويحة "بعلق" بالأزمة و مع شوية شوب بدون مكيف تبريد ، خذلك عدد الناس اللي رح تفطر على بعض .. هاد مستعجل بدو يروح يتخبا من الشوب .. وهاد بدو يلحق يشتري عصير وقطايف .. وهاد بدو يلحق العزومة ... ^ موعد الإفطار .... تجتمع العائلة على السفرة تنتظر سماع الله أكبر .. واصوات الصحون و الكاسات و المعالق و رائحة الأكل تعم المكان .. كلها تبعث الفرح و السرور بين افراد العائلة .. وما بننسا "طوش" أطفالنا " زيح الكرسي غاد ، هات معلقتي ، ليش صحني اصغر من صحنك .. ماااااامااااااااااا " .... ^ موعد الفتيش " الفقيع " ... هاي بدها قعدة .. هي فقرة خاصة للأطفال في أيام رمضان .. تبدأ بعد الإفطار مباشرة و تستمر لما بعد صلاة التراويح ... أنا لا أشجعها .. و ضدها .. لإنو السنة الماضية وانا رايح على صلاة التراويح .. واحد الله يسامحو "زت" جوى السيارة فقيعة من لكبار .. من اللي "بتنقز" .. ^ سهرة رمضان .... سهرات رمضان بنقضيها على باب الحارة الجزء السادس .. معتز اتجوز صبحية و ام شهاب رجعت طالق .. ولله أهلين بالعقيد انا من مكاني هذا و من منبري هذا احذر باللعب بالفقيع هذا أولا .. ثانيا بلا منه الطبخ الكثير .. و اذا زاد اكل اتذكرو جاركم الفقير .. ثالثا رمضان شهر الصبر .. مش شهر "السنيورة" أوكي شباب !! . سلام
