تعالي شوفي يُمّا

شلونك ..؟ مبسوطة بقعدة الغور مع أبوي ..؟؟ بعرفك ؛ هسا بتحكي شوه الأسئلة الباردة مثل وجهك ..بس والله يُمّا ما قصدت إلا إني اسمع الجواب اللي أنا عارفه منك ..!

تعالي شوفي يُمّا ..تعالي ..النسوان عندنا حبطرش ..و أكثر من حبطرش ..كلهن يوم عيد الأم يقعدن يعيطن و يتبكبكن ..قال ناقصهن حنّيّة ..يستنن باولادهن يجيبلوهن هدايا ..! بدّي أسألك و خلّي جوابك يلعلع ..خلي الكون كله يسمع فيه ..أنا عمري ما جبتلك هديّة بعيد الأم ..صح ..؟ وات عمرك ما طلبتي ..صح ..؟ طيب ليش ما تطلبي و ليش أنا ما أجيب ..؟ لو جبتلك رح تحبيني أكثر ..؟ ولو ما جبتلك رح ينقص حبّك إلي و خوفك علي و لهفتك اللي استناها كل ما راسي وجعني ..؟؟

تعالي شوفي يمّا ..نسوان الفيسبوك و الواتس أب ..الوحدة منهن قاعدة طول اليوم (تفسفس و توتس ) و ناسية دارها وأولادها ..و نازلات حل بمشاكل الناس و مش فاضيات لمشاكلهن ..طبعا مش كلهن يُمّا ..ولا يمكن أحط بذمتي و بحظي ..بس كثير من اللي بعرفهن ناسيات حالهن و ساحلات ..الوحدة منهن لا بتعرف ترضع ابنها ولا بتعرف تطبخ قلاية بندورة و تتعاجز تلبس ابنها ..وبالأخير بدها ابنها يهديها هدية عيد الأم وإذا ما أهداها تظربها بوز ليوم البوز ..

والغريب يُمّا ..ولا وحدة منهن تعرف تعجن و تخبز ..و بدها ابنها يحط اغنية مارسيل خليفة ( أحن إلى خبز أمّي) ..!! يمّا ..الله يحمانا يُمّا ..نسوان لما ينقطعن من الدخان ياخذن من اولادهن ..ايش تربية وإيش حنّية ..وإيش ؟؟ اشي من الآخر ..

يُمّا ..مش جايبلك هدية ..ورح تظلّي تحبيني غصب عنك ..وما بدي اياك تجي تشوفي ..خايف عليك من الصدمة ..خليكي هناك عند ابوي و أنا اللي رح أظل أجي..

يسعدك يمّا ..وانت احكيلي جملتك ما غيرها : الله يوفقك يا ميمتي