بدنا نعرف ليش

كتب د. فاضل الزعبي 

واحنا صغار في الابتدائية ... مدرس العربي -ابو توفيق- كان معقدنا .. في القواعد والانشاء ... وكان يفرح لما يشوفنا متنبلين – من تنبل - ومش فاهمين... في يوم دخل وبدون مقدمات ... طلب منا نكتب موضوع انشاء بعنوان.... لماذا... لماذا ... شو يعني !!! ... لماذا هذا العنوان كان تعليقي .. طبعا جواب المعلم كان ... بلا سقاعة وبرادة وجه.. في نهاية الحصة بدي استلم الموضوع... طيب لماذا.. لماذا (يعني ليش).. انا في قريه نظامها التعليمي يقوم على تسلط المدرس على طلابه ... لماذا انا طالب في هيك مدرسة شبابيكها مسكرة بالكرتون بدل الزجاج... ليش انا في مدرسة ... الآذن – يعني فراش المدرسة ... ببيعنا سجاير فرط واغلى من السوق وخلانا ندخن قمع سجاير - سبارس... ليش المدير متسلط على المدرسين واحنا معاهم – وخاوة لازم سندويشته كل يوم على مدرس ... ليش المدير بيسمح لفلان بدون علان يعطي دروس خصوصي ... وليش العمل الشعبي بيعمله المدير للطلاب في الحاكورة اللي جنب بيته... طيب ليش لازم امتحان توجيهي ... مش كافي عدد المنتحرين من ورا هالامتحان كل سنه.. في قرى فهمانه اذا بموت نص عدد ضحايا التوجيهي من ورا مباراه ..بلغوا المباريات .. او اي احتفال او مناسبه بتموت ناس .. بلغوا هيك مناسبات.. طيب ليش رئيس البلدية بهدل المدير لانه ابنه ما كانش الاول في الصف ... وليش الشاويش لطش ثلاث مدرسين في النظارة لانهم حفظّوا الاولاد نشيد بلاد العرب اوطاني... طيب ليش اختيار مجلس القرية بصوت واحد ... يا زلمة حتى برنامج اراب ايدول فيه اربعة اصوات بتحكم على جيش المرشحين وكمان برنامج (ذ فويس) فيه اربعة ... ليش .... ليش طلع مجلس القرية هيك ... اكيد من وراء هالصوت لحاله ... واكيد مجلس القرية مش رح يقدر الا يلعب في الوقت الضائع... ليش مجلس القرية بدو يسكر دكانه ابو داود في حارتنا ... مهاي الدكانة فيها عقد تمليك ... واذا سكرتها شو رح يصير ... رح تظل بإسمه وإله ... ليش المجلس ما لغى عقد التمليك ولو انه انا مش كتير شايف انها حركة مفيدة، وبصراحة لا بتقدم ولا بتأخر….. ليش نزعل ان الشاب اليافع انتحر لما عايروه انه لقيط يعني بندوق.. مهو عضو مجلس القرية ابو عطوة عاير كل البناديق (اللقطاء) على المكشوف ... ليش... لماذا.... كمان عدد المواليد اليومي 500 في القرية وبيدخلها من جيرانها 500 يعني 3,5% زيادة في سكان القريه، 3,5% زيادة في ضيوف القرية... صاروا 7%... والمختار بيقول حسب كاتب الاحصاءات اللي في البلدية انه النمو الاقتصادي 3,6% لهسة. ليش زيادة سكان القرية بلعت النمو و هرسته... وهيك صار في عجز في ميزانية القرية 3,5% اتوماتيكي... يعني ليش ما رح تخلص .. بس الجواب الها كلها واحد.. اكيد انتو عارفينه...