البيضة كسرت الحجر
بقلم د. فاضل الزعبي
لا بشجع برشلونة ولا ريال مدريد.. بشجع اللي بفوز.. ماشي !!
حتى في (ذ فويس) انا مع اللي بختاره الجمهور و بيفوز ... ماشي !!
ولا انا مع الخمير الحمر ولا مع نوردم سيهانوك ... في كمبوديا ... ماشي!!
ولا مع بوروندي ولا مع راوندا ولا مع الهوتو ولا مع التوتسي... ماشي!!
بس كل هذول ما بهموني وعلى نظرية ** ابن الهبلة بعيش اكثر ** انا مع اللي بيفوز منهم... مش فاضي للقلق والاحباط والحسرة...
بس في قريتي انا مع ابوعناد ومع مجلس القرية ... حتى يحطوا حد لابو لطفي مختارنا اللي بيضوي وما بيطفي ...
من هالاسبوع تغيرت الامور.. صرت مع ابو لطفي.. يا عمي طلع زلمة.. طلع ثقالة..
وما حدا بيهزوا.. والله انه ذكر.. يعني فحل..
طبّلوا وزمروا .. وبدل ما ابولطفي يرقص.. رقصوا همو على طبلة مشروخة ...
بطحهم كلهم... جابهم كتاف.. علي النعمة انه انا اتخضيت .. وانمغصت.. والقهر والاحباط ذبحني.. وانا في هالعمر مش فاضي انجلط ميشانهم ** الحزن بيعلم البكاء والفرح بيعلم الزغاريد** فأسهل ارجع لنظرية الهوتو والتوتسي .. اللي بيغلب انا معه.. والمختار غلبهم.. وبالضربة القاضية .. يا مختار انا معك.. عمي** البيضة ما بتكسر الحجر**...
مجلس القرية.. شو رح يطلع منك غير انك تنغلب وبالثلاثة.. ** ابوك البصل وامك الثوم منين لك الريحة الحلوة يا مشؤوم ** ..
والله المختار جاب جول ولاجول الصالحاني الوحداتي في الرمثا ... واحلى من جول السلمان الرمثاوي في العربي.. خلصونا عاد..!!
والله يا حلوين ..** اللي بربط في رقبته حبل – الف من يسحبه ** ، وربطتوه وحطيتوا شروط واعطيتو انذار نهائي و هددتو بسحب البساط و لا القثه .. اه اه القثه .. ولفيتوا على رقبتكوا اكثر من حبل.. ريحتوا المختار.. اجا وسحبه وهوه مرتاح... والله بهنيي من قلبي وبقلوه كمان حمدالله عالسلامة من حادث الكوستر البسيط... الله حماك وحفظك حتى لا يشمت شلة المجلس.. اي ** مجلسك زي ما تربيه ومختارك زي ما تعودوا **...
يا دي الشيلة ويادي الحطة.. ** رحتو على جمل وارجعتو على قطة **.. و انتو عارفين ** اللي بيعمل ايديه مغرفة بيصبر على ضرب الطناجر **... والله المختار ** غز رايته ومحا سيئاته**...
امبارح يوم العرب شدو وشديت معهم – ولا بدكوا اياني اقعد لحالي..
يا مختار اذا لم تجد لك حاقدا فاعرف انك انسان فاشل وانته ماشاءالله نجاحك بلعلع.. وببرق برق زي الالعاب الناريه ...
لويش بدي اتذكرك يا بصل.. وكل خمشة بدمعة .. انا معك يا مختار طول ما انت فايز.. بس دير بالك.. نفس النغمة والموال بمشي عليك وبقلب عليك اذا بطحوك.. وبكون اول واحد بيزغرد لهم .. مع اني ما زغردتلك .... عاد اذا هالبيضة كسرت الحجر..
